ꯁꯣꯌꯥꯝ ꯅꯤꯉꯣꯜ ꯀꯥꯡꯖꯝ ꯑꯣꯡꯕꯤ ꯁ꯭ꯋꯤꯇꯤ

ꯁꯣꯌꯥꯝ ꯅꯤꯉꯣꯜ ꯀꯥꯡꯖꯝ ꯑꯣꯡꯕꯤ ꯁ꯭ꯋꯤꯇꯤ ꯑꯁꯤ ꯃꯤꯇꯩꯂꯣꯟꯒꯤ ꯃꯃꯤ ꯀꯨꯝꯍꯩ ꯁꯛꯇꯝ ꯂꯥꯡꯕꯤ ꯁꯤꯟꯂꯣꯏ ꯑꯃꯅꯤ ꯫

ꯄꯨꯟꯁꯤ ꯋꯥꯔꯤ

ꯒꯨꯋꯥꯍꯥꯇꯤꯒꯤ ꯒꯅꯦꯁꯒꯨꯔꯤꯗꯒꯤ ꯄꯣꯛꯈꯤꯕ ꯑꯃꯁꯨꯡ ꯄꯨꯔꯛꯈꯤꯕ ꯁ꯭ꯋꯤꯇꯤ ꯑꯁꯤ ꯖꯒꯣꯏ, ꯏꯁꯩ-ꯅꯣꯡꯃꯥꯏ, ꯐꯝꯕꯥꯛ ꯀꯨꯝꯍꯩ ꯑꯃꯁꯨꯡ ꯃꯃꯤ ꯀꯨꯝꯍꯩꯁꯤꯡ ꯌꯥꯝꯅ ꯄꯥꯝꯃꯤ꯫ ꯃꯍꯥꯛ ꯑꯁꯥꯃꯤꯖꯒꯤ ꯕꯤꯍꯨ ꯖꯒꯣꯏꯗ ꯐꯖꯅ ꯃꯔꯥꯜ ꯂꯩꯇꯦ, ꯑꯁꯥꯃꯤꯁ ꯏꯁꯩꯁꯤꯡ ꯌꯥꯝꯅ ꯐꯖꯅ ꯁꯛꯏ꯫ ꯃꯍꯥꯛꯀꯤ ꯈꯣꯟꯖꯦꯜ ꯅꯨꯡꯁꯤꯕ ꯈꯣꯟꯖꯦꯜ ꯑꯃꯁꯨ ꯂꯩ꯫ ꯃꯍꯥꯛꯀꯤ ꯁ꯭ꯀꯨꯜꯒꯤ ꯃꯇꯝꯗ ꯁ꯭ꯋꯤꯇꯤꯅ ꯁ꯭ꯇꯦꯖꯇ ꯖꯒꯣꯏꯒꯤ ꯇꯣꯉꯥꯟ-ꯇꯣꯉꯥꯟꯕ ꯃꯑꯣꯡꯁꯤꯡ ꯄꯥꯡꯊꯣꯛꯈꯤ, ꯃꯍꯥꯛꯅ ꯊꯧꯔꯝ ꯀꯌꯥꯗ ꯏꯁꯩꯁꯨ ꯁꯛꯈꯤ꯫ ꯑꯗꯨꯕꯨ ꯃꯍꯥꯛ ꯖꯒꯣꯏ ꯑꯃꯁꯨꯡ ꯏꯁꯩ-ꯅꯣꯡꯃꯥꯏꯒꯤ ꯃꯇꯥꯡꯗ ꯃꯍꯥꯛꯀꯤ ꯊꯕꯛꯁꯤꯡꯗ ꯄꯦꯟꯗꯦ꯫ ꯃꯍꯥꯛꯀꯤ ꯑꯃꯠꯇ ꯉꯥꯏꯔꯕ ꯄꯥꯟꯗꯝ ꯑꯃꯁꯨꯡ ꯑꯄꯥꯝꯕꯗꯤ ꯃꯅꯤꯄꯨꯔꯤ ꯃꯃꯤ ꯀꯨꯝꯍꯩꯁꯤꯡꯗ ꯃꯃꯤꯔꯣꯏ ꯑꯃꯥ ꯑꯣꯏꯕꯅꯤ꯫ ꯑꯗꯨꯕꯨ ꯃꯤꯑꯣꯏ ꯑꯌꯥꯝꯕꯅ ꯑꯁꯥꯃꯤꯁ ꯑꯃꯁꯨꯡ ꯕꯦꯡꯒꯣꯂꯤꯒꯤ ꯃꯅꯨꯡ ꯆꯟꯕ ꯌꯥꯝꯅ ꯇꯣꯉꯥꯟꯕ ꯐꯨꯔꯨꯞ ꯑꯃ ꯂꯩꯕꯅ ꯃꯔꯝ ꯑꯣꯏꯗꯨꯅ ꯀꯩꯗꯧꯅꯨꯡꯗ ꯄꯥꯟꯗꯝ ꯑꯗꯨ ꯐꯪꯈꯤꯗꯦ꯫ ꯃꯍꯥꯛ ꯑꯁꯥꯃꯤꯁꯅ ꯅꯝꯅ ꯂꯩꯕ ꯃꯐꯝ ꯑꯃꯗ ꯄꯣꯛꯈꯤꯕꯅ ꯃꯔꯝ ꯑꯣꯏꯗꯨꯅ ꯃꯍꯥꯛꯅ ꯃꯍꯥꯛꯀꯤ ꯄꯥꯟꯗꯝ ꯑꯃꯁꯨꯡ ꯑꯄꯥꯝꯕ ꯑꯗꯨ ꯃꯄꯨꯡ ꯐꯥꯍꯟꯅꯕ ꯂꯝꯖꯤꯡꯕꯤꯒꯗꯕ ꯃꯤꯑꯣꯏ ꯑꯃ ꯊꯤꯕ ꯉꯝꯈꯤꯗꯦ꯫ ꯃꯈꯣꯏꯒꯤ ꯃꯅꯥꯛ ꯅꯛꯄꯗ ꯂꯩꯔꯤꯕ ꯐꯤꯚꯝ ꯑꯗꯨ ꯈꯪꯂꯗꯨꯅ, ꯃꯍꯥꯛꯀꯤ ꯃꯃꯥ-ꯃꯄꯥꯅ ꯃꯍꯥꯛꯄꯨ ꯃꯍꯥꯛꯀꯤ ꯄꯥꯟꯗꯝꯒꯤ ꯂꯝꯕꯤꯗ ꯃꯈꯥ ꯇꯥꯅ ꯆꯪꯁꯤꯟꯕ ꯌꯥꯍꯟꯈꯤꯗꯦ꯫ ꯃꯍꯥꯛꯀꯤ ꯃꯃꯥ-ꯃꯄꯥꯒꯤ ꯋꯥꯐꯝ ꯑꯗꯨ ꯌꯥꯗꯕꯅ ꯃꯍꯥꯛꯄꯨ ꯌꯥꯅꯤꯡꯗꯕ ꯑꯉꯥꯡ ꯑꯃ ꯑꯣꯏꯅ ꯆꯩꯔꯥꯛ ꯄꯤꯕ ꯉꯝꯃꯤ꯫

ꯃꯍꯥꯛꯀꯤ ꯃꯃꯥ-ꯃꯄꯥꯅ ꯃꯍꯥꯛꯄꯨ ꯐꯥꯎꯕ ꯃꯥꯏꯊꯤꯕ ꯄꯤꯈꯤ꯫ ꯃꯍꯥꯛꯀꯤ ꯃꯃꯥ-ꯃꯄꯥꯅ ꯁ꯭ꯋꯤꯇꯤꯒꯤ ꯑꯄꯥꯝꯕ ꯑꯗꯨ ꯍꯣꯡꯗꯣꯛꯄ ꯉꯝꯈꯤꯗꯦ꯫ ꯃꯗꯨꯒꯤ ꯃꯍꯨꯠꯇ ꯃꯍꯥꯛꯅ ꯀꯩꯗꯧꯅꯨꯡꯗ ꯑꯇꯣꯞꯄꯁꯤꯡꯒꯤ ꯃꯇꯦꯡ ꯑꯃꯠꯇ ꯌꯥꯎꯗꯅ ꯃꯍꯥꯛꯀꯤ ꯍꯩꯊꯣꯏ-ꯁꯤꯡꯊꯣꯏꯕꯁꯤꯡ ꯎꯠꯅꯕ ꯄ꯭ꯂꯦꯠꯐꯣꯔꯝ ꯈꯨꯗꯤꯡꯃꯛ ꯃꯥꯡꯍꯟꯈꯤꯗꯦ꯫ ꯌꯥꯝꯅ ꯆꯤꯟꯕ ꯑꯃꯁꯨꯡ ꯂꯥꯎꯕ ꯒꯨꯋꯥꯍꯥꯇꯤꯗ ꯀꯂꯥꯒꯤ ꯃꯑꯣꯡꯁꯤꯡꯗ ꯃꯁꯥꯅ ꯃꯁꯥꯕꯨ ꯆꯨꯝꯃꯤ ꯍꯥꯏꯕꯒ ꯂꯣꯏꯅꯅ ꯁ꯭ꯋꯤꯇꯤꯒꯤ ꯅꯨꯡꯉꯥꯏꯔꯕ ꯄꯨꯟꯁꯤ ꯑꯃꯒꯤ ꯈꯣꯡꯆꯠ ꯑꯗꯨ ꯂꯣꯏꯁꯤꯜꯂꯤ꯫ ꯃꯍꯥꯛꯅ ꯏꯪ ꯲꯰꯰꯵ꯗ ꯒꯨꯋꯥꯍꯥꯇꯤꯒꯤ ꯃꯥꯔꯤꯌꯥ ꯃꯣꯟꯇꯦꯁꯣꯔꯤ ꯁ꯭ꯀꯨꯜꯗꯒꯤ ꯃꯦꯇ꯭ꯔꯤꯛ ꯂꯣꯏꯔꯕ ꯍꯦꯛ ꯃꯇꯨꯡꯗ ꯌꯥꯝꯅ ꯑꯉꯥꯡ ꯑꯣꯏꯔꯤꯉꯩꯗ ꯀꯥꯡꯖꯝ ꯑꯃꯔꯒ ꯂꯨꯍꯣꯡꯈꯤ꯫ ꯃꯃꯤ ꯀꯨꯝꯍꯩꯁꯤꯡꯗ ꯁꯛꯇꯝ ꯂꯥꯡꯕꯒꯤ ꯃꯍꯥꯛꯀꯤ ꯄꯥꯟꯗꯝꯗꯤ ꯃꯍꯥꯛꯅ ꯂꯨꯍꯣꯡꯂꯕ ꯃꯇꯨꯡꯗꯁꯨ ꯃꯍꯥꯛꯀ ꯂꯣꯏꯅꯅ ꯂꯩꯈꯤ꯫ ꯑꯗꯨꯕꯨ ꯑꯩꯈꯣꯏꯒꯤ ꯈꯨꯟꯅꯥꯏꯗ ꯂꯨꯍꯣꯡꯂꯕ ꯅꯨꯄꯤ ꯑꯃꯒꯤ ꯊꯥꯛ ꯑꯁꯤ ꯃꯍꯥꯛꯀꯤ ꯃꯃꯤ ꯀꯨꯝꯍꯩꯁꯤꯡꯗ ꯁꯛꯇꯝ ꯂꯥꯡꯕꯒꯤ ꯑꯄꯥꯝꯕ ꯑꯗꯨ ꯐꯣꯡꯗꯣꯛꯄꯗ ꯑꯄꯟꯕ ꯑꯃ ꯑꯣꯏꯈꯤ꯫ ꯁ꯭ꯋꯤꯇꯤꯅ ꯃꯃꯤ ꯀꯨꯝꯍꯩꯁꯤꯡꯗ ꯃꯍꯥꯛꯀꯤ ꯄꯨꯛꯅꯤꯡ ꯍꯨꯅꯤꯡꯉꯥꯏ ꯑꯣꯏꯕꯒꯤ ꯃꯇꯥꯡꯗ ꯋꯥꯔꯦꯞ ꯂꯧꯕ ꯑꯁꯤꯅ ꯑꯔꯣꯏꯕꯗ ꯃꯍꯥꯛꯀꯤ ꯃꯄꯨꯔꯣꯏꯕ ꯑꯃꯁꯨꯡ ꯏꯃꯨꯡ ꯃꯅꯨꯡꯒꯤ ꯃꯤꯑꯣꯏꯁꯤꯡꯕꯨ ꯃꯍꯥꯛꯄꯨ ꯁꯧꯒꯠꯅꯕ ꯑꯣꯟꯊꯣꯛꯄ ꯉꯝꯒꯅꯤ꯫ ꯁꯔꯃꯤꯂꯥꯅ ꯃꯍꯥꯛꯀꯤ ꯃꯆꯤꯟ-ꯃꯅꯥꯎ ꯊꯣꯛꯄꯒꯤ ꯃꯆꯦ ꯑꯃꯅ ꯁ꯭ꯋꯤꯇꯤꯒꯤ ꯑꯄꯥꯝꯕꯗ ꯅꯤꯇꯤꯒꯤ ꯑꯣꯏꯕ ꯃꯇꯦꯡ ꯄꯥꯡꯉꯤ꯫ ꯃꯁꯤꯒꯤ ꯃꯇꯦꯡ ꯄꯨꯝꯅꯃꯛ ꯑꯁꯤꯒ ꯂꯣꯏꯅꯅ ꯁ꯭ꯋꯤꯇꯤꯅ ꯑꯉꯥꯡ ꯑꯣꯏꯔꯤꯉꯩꯗꯒꯤ ꯍꯧꯅ ꯃꯍꯥꯛꯀꯤ ꯃꯪꯂꯥꯟ ꯑꯗꯨ ꯀꯦꯃꯦꯔꯥꯒ ꯃꯥꯌꯣꯛꯅꯍꯟꯈꯤꯕ ꯃꯇꯝꯗ ꯇꯁꯦꯡꯕ ꯑꯣꯏꯔꯛꯈꯤ꯫ ꯃꯍꯥꯛꯅ ꯅꯨꯃꯤꯠ ꯑꯗꯨ ꯍꯧꯖꯤꯛꯁꯨ ꯅꯤꯡꯁꯤꯡꯂꯤ; ꯃꯁꯤ ꯏꯪ ꯲꯰꯱꯴ꯒꯤ ꯖꯨꯟ ꯱꯴ꯗ ꯑꯣꯏꯈꯤ꯫ ꯁ꯭ꯋꯤꯇꯤꯅ ꯃꯃꯤ ꯀꯨꯝꯍꯩ 'ꯑꯃꯨꯛꯇꯥ ꯑꯅꯤ'ꯒꯤꯗꯃꯛ ꯑꯇꯦꯟꯕ ꯃꯇꯝꯒꯤ ꯑꯣꯏꯅ ꯂꯨꯍꯣꯡꯂꯕ ꯅꯨꯄꯤ ꯑꯃ ꯑꯣꯏꯅ ꯏꯆꯝ ꯆꯝꯕ ꯊꯧꯗꯥꯡ ꯑꯃꯒꯤꯗꯃꯛ ꯀꯦꯃꯦꯔꯥꯒ ꯃꯥꯌꯣꯛꯅꯈꯤ꯫ ꯃꯃꯤ ꯀꯨꯝꯍꯩ ꯑꯁꯤ ꯔꯣꯃꯤ ꯃꯩꯇꯩꯅ ꯂꯝꯖꯤꯡ-ꯂꯝꯇꯥꯛꯈꯤ꯫ ꯃꯤꯀꯨꯞ ꯑꯗꯨꯃꯛ ꯁ꯭ꯋꯤꯇꯤꯒꯤꯗꯃꯛꯇ ꯈ꯭ꯋꯥꯏꯗꯒꯤ ꯅꯨꯡꯉꯥꯏꯕ ꯃꯤꯀꯨꯞ ꯑꯣꯏꯈꯤ꯫

ꯃꯁꯤ ꯃꯃꯤ ꯀꯨꯝꯍꯩ ꯑꯁꯤꯗ ꯃꯍꯥꯛꯀꯤ ꯁꯛꯇꯝ ꯂꯥꯡꯈꯤꯕ ꯑꯗꯨꯅ ꯅꯠꯇꯦ ꯑꯗꯨꯕꯨ ꯃꯁꯤ ꯃꯍꯥꯛꯀꯤ ꯑꯄꯥꯝꯕ ꯑꯗꯨ ꯑꯍꯥꯟꯕ ꯑꯣꯏꯅ ꯃꯄꯨꯡ ꯐꯥꯍꯟꯈꯤꯕ ꯃꯤꯀꯨꯞ ꯑꯃ ꯑꯣꯏꯕꯅ ꯑꯣꯏꯈꯤ꯫ ꯃꯇꯨꯡꯗ, ꯑꯃꯔ ꯔꯥꯖꯅ ꯂꯝꯖꯤꯡ-ꯂꯝꯇꯥꯛꯈꯤꯕ ꯃꯃꯤ ꯀꯨꯝꯍꯩ 'ꯇꯥꯁ ꯅꯥꯡꯇꯥꯅꯤ'ꯗ ꯑꯣꯂꯦꯟꯒ ꯂꯣꯏꯅꯅ ꯀꯨꯝꯃꯤꯟꯅꯈꯤ꯫ ꯃꯍꯥꯛꯅ ꯑꯥꯏ.ꯑꯦꯁ.ꯇꯤ.ꯚꯤ. ꯅꯦꯠꯋꯥꯔ꯭ꯛꯇ ꯁꯟꯗꯣꯛꯂꯤꯕ ꯑꯆꯧꯕ ꯇꯤ.ꯚꯤ. ꯁꯤꯔꯤꯌꯦꯜ 'ꯆꯩꯅꯥꯈꯣꯜ'ꯗ ꯄꯨꯂꯤꯁ ꯀꯃꯥꯟꯗꯣ ꯑꯃꯒꯤ ꯂꯣꯏꯅꯕꯤꯒꯤ ꯁꯛꯇꯝ ꯂꯥꯡꯈꯤ꯫ ꯃꯍꯥꯛꯅ ꯃꯈꯥ ꯇꯥꯅ ꯁꯨꯙꯤꯔ ꯀꯥꯡꯖꯝꯅ ꯂꯝꯖꯤꯡ-ꯂꯝꯇꯥꯛꯈꯤꯕ ꯃꯃꯤ ꯀꯨꯝꯍꯩ 'ꯖꯝ ꯃꯈꯣꯡ'ꯗ ꯑꯣꯖꯥ ꯑꯃꯒꯤ ꯁꯛꯇꯝ ꯂꯥꯡꯈꯤ꯫ ꯃꯍꯥꯛ ꯑꯅꯧꯕ ꯐꯣꯡꯕ ꯃꯉꯥ ꯍꯦꯟꯕꯗ ꯎꯕ ꯐꯪꯒꯅꯤ꯫ ꯃꯍꯥꯛꯀꯤ ꯂꯥꯛꯀꯗꯧꯔꯤꯕ ꯃꯃꯤ ꯀꯨꯝꯍꯩꯁꯤꯡꯒꯤ ꯃꯅꯨꯡꯗ, ꯃꯍꯥꯛ ꯁꯃꯥꯅꯟꯗꯅ ꯂꯝꯖꯤꯡ-ꯂꯝꯇꯥꯛꯈꯤꯕ ꯃꯃꯤ ꯀꯨꯝꯍꯩꯒꯤ ꯃꯤꯡꯊꯣꯜ 'ꯂꯨꯈꯣꯏ ꯑꯣꯏꯅꯥ'ꯗ ꯂꯦꯗꯤ ꯗꯣꯛꯇꯔ ꯑꯃꯒꯤ ꯁꯛꯇꯝ ꯂꯥꯡꯒꯅꯤ꯫ ꯃꯃꯤ ꯀꯨꯝꯍꯩꯁꯤꯡꯗ ꯃꯍꯥꯛꯀꯤ ꯁꯛꯇꯝ ꯑꯁꯤꯅ ꯃꯍꯥꯛꯄꯨ ꯂꯨꯍꯣꯡꯂꯕ ꯅꯨꯄꯤ ꯑꯃꯒꯤ ꯁꯛꯇꯝ ꯂꯥꯡꯕ ꯎꯕꯗ ꯅꯨꯡꯉꯥꯏꯕ ꯐꯥꯎꯋꯤ ꯍꯥꯏꯕ ꯎꯠꯂꯤ꯫ ꯃꯍꯥꯛꯅ ꯑꯀꯛꯅꯕ ꯊꯧꯗꯥꯡ ꯑꯁꯤ ꯂꯧꯗꯨꯅ ꯇꯣꯉꯥꯟ-ꯇꯣꯉꯥꯟꯕ ꯀꯌꯥꯒꯤ ꯊꯃꯣꯏ ꯁꯣꯛꯍꯟꯒꯅꯤ ꯍꯥꯏꯅ ꯊꯥꯖꯕ ꯊꯝꯂꯤ꯫ ꯃꯍꯥꯛꯅ ꯃꯥꯏ ꯄꯥꯛꯀꯗ꯭ꯔ ꯅꯠꯇ꯭ꯔꯒ ꯇꯧꯔꯣꯏꯗ꯭ꯔ ꯍꯥꯏꯕꯗꯨ ꯃꯍꯥꯛꯅ ꯂꯦꯞꯊꯣꯛꯇꯦ꯫ ꯅꯍꯥ ꯑꯣꯏꯔꯕꯁꯨ ꯃꯍꯥꯛ ꯂꯨꯍꯣꯡꯂꯕꯅ ꯃꯍꯥꯛꯀꯤ ꯑꯄꯥꯝꯕꯒꯤ ꯃꯇꯨꯡ ꯏꯟꯅ ꯃꯀꯣꯛ ꯊꯣꯡꯕ ꯁꯛꯇꯝ ꯑꯃꯥ ꯂꯧꯅꯕ ꯈꯟꯈꯤꯗꯦ꯫ ꯑꯗꯨꯝ ꯑꯣꯏꯅꯃꯛ ꯃꯍꯥꯛꯅ ꯂꯝꯖꯤꯡ-ꯂꯝꯇꯥꯛꯄ ꯑꯗꯨꯅ ꯃꯉꯣꯟꯗ ꯄꯤꯈꯤꯕ ꯊꯧꯗꯥꯡ ꯈꯨꯗꯤꯡꯃꯛ ꯂꯧꯋꯤ꯫ ꯃꯃꯤ ꯀꯨꯝꯍꯩꯁꯤꯡ ꯑꯁꯤ ꯕꯣꯛ꯭ꯁ ꯑꯣꯐꯤꯁꯇ ꯌꯧꯅꯕ ꯃꯍꯥꯛꯅ ꯑꯣꯏꯊꯣꯛꯄ ꯌꯥꯕ ꯃꯑꯣꯡ ꯈꯨꯗꯤꯡꯃꯛꯇ ꯁꯛꯇꯝ ꯂꯥꯡꯕ ꯅꯠꯇ꯭ꯔꯒ ꯊꯕꯛ ꯇꯧꯕ ꯄꯥꯝꯃꯤ꯫ ꯃꯃꯤ ꯀꯨꯝꯍꯩ ꯑꯃꯗ ꯁꯛꯇꯝ ꯂꯥꯡꯕꯒꯤ ꯃꯍꯥꯛꯀꯤ ꯑꯄꯥꯝꯕ ꯑꯗꯨ ꯃꯄꯨꯡ ꯐꯥꯔꯕꯁꯨ ꯃꯍꯥꯛꯅ ꯃꯗꯨꯗ ꯄꯦꯟꯈꯤꯗꯦ꯫ ꯃꯍꯥꯛꯀꯤ ꯃꯊꯪꯒꯤ ꯄꯥꯟꯗꯝꯗꯤ ꯃꯍꯥꯛꯀꯤ ꯆꯍꯤ ꯇꯔꯨꯛ ꯁꯨꯔꯕ ꯃꯆꯥꯅꯨꯄꯥ ꯔꯤꯁꯤꯕꯨ ꯃꯍꯥꯛꯀꯤ ꯂꯥꯛꯀꯗꯧꯔꯤꯕ ꯅꯨꯃꯤꯠꯁꯤꯡꯗ ꯃꯤꯌꯥꯝꯅ ꯄꯥꯝꯅꯕ ꯃꯃꯤꯔꯣꯏ ꯑꯃ ꯑꯣꯏꯍꯟꯕꯅꯤ꯫ ꯑꯁꯨꯝꯅ, ꯁ꯭ꯋꯤꯇꯤꯅ ꯃꯥꯏꯄꯥꯛꯂꯕ ꯃꯃꯤꯔꯣꯏ ꯑꯃꯥ ꯑꯣꯏꯕꯒꯤ ꯑꯄꯥꯝꯕ ꯑꯗꯨ ꯃꯍꯥꯛꯀꯤ ꯃꯆꯥꯅꯨꯄꯥꯒꯤ ꯈꯨꯠꯊꯥꯡꯗ ꯃꯄꯨꯡ ꯐꯥꯍꯟꯕ ꯉꯝꯈꯤ꯫ ꯃꯍꯥꯛꯁꯨ ꯃꯁꯤ ꯃꯍꯥꯛꯀꯤ ꯂꯝꯕꯤꯗ ꯂꯥꯛꯀꯅꯤ ꯍꯥꯏꯅ ꯊꯥꯖꯩ꯫ ꯑꯃꯁꯨꯡ ꯃꯁꯤꯅ ꯃꯔꯝ ꯑꯣꯏꯗꯨꯅ, ꯁ꯭ꯋꯤꯇꯤ ꯑꯁꯤ ꯃꯇꯝ ꯄꯨꯝꯅꯃꯛꯇ ꯊꯨꯝꯕ ꯑꯃꯁꯨꯡ ꯅꯣꯛꯅꯤꯡꯕ ꯑꯣꯏꯅ ꯎꯕꯒꯤ ꯃꯔꯝ ꯑꯁꯤꯅꯤ꯫

ꯃꯁꯤꯁꯨ ꯌꯦꯡꯕꯤꯌꯨ

• ꯂꯥꯏꯁ꯭ꯔꯝ ꯂꯂꯤꯇꯥꯕꯤ